Emilio González avanza que as Forzas e Corpos de Seguridade do Estado manterán controis de vehículos e vixilancia nocturna para evitar a entrada de uva foránea na vendima

Imaxe da reunión de coordinación para control de entrada de uva foránea

28/08/2020

O subdelegado do Goberno apunta que a presenza das Forzas e Corpos de Seguridade e dos operativos organizados polas mesmas, así como a colaboración dos Consellos Reguladores é determinante para evitar o fraude coa entrada de uva foránea na provincia

Na campaña desenvolvida en 2019 non se rexistraron incidencias graves en canto ao uso fraudulento de uva foránea


O subdelegado do Goberno en Ourense, Emilio González Afonso, mantivo durante a mañá de hoxe unha reunión de coordinación para o control de entrada de uva foránea, en coincidencia co inicio da vendima, con representantes da Delegación Territorial da Xunta de Galicia, das Forzas e Corpos de Seguridade e dos Consellos Reguladores das Denominacións de Orixe da provincia.

Na xuntanza realizouse unha valoración positiva das actuacións levadas a cabo polas Forzas e Corpos de Seguridade do Estado na campaña do ano 2019 na que non se rexistraron incidencias graves en canto ao uso fraudulento de uva foránea. Os presentes na reunión coincidiron en afirmar que controlar o emprego da uva permitida por cada consello regulador é un dos puntos fundamentais para garantir a calidade dos viños na que se basea o prestixio das distintas Denominacións de Orixe existentes na provincia (Monterrei, Ribeira Sacra, Ribeiro e Valdeorras).

Por iso, debido á existencia de sospeitas de que se produzan novos intentos de introdución de uva foránea, articularase unha maior coordinación e información entre as Forzas e Corpos de Seguridade do Estado e os responsables dos consellos reguladores das catro Denominacións de Orixe. Así mesmo, intensificarase a presenza física de axentes, o control de vehículos e a vixilancia nocturna.

O subdelegado do Goberno apuntou que a presenza das Forzas e Corpos de Seguridade e dos operativos organizados polas mesmas, así como a colaboración dos consellos reguladores “é determinante para evitar o fraude coa entrada de uva foránea nun sector de vital importancia para a economía da provincia”.

Os diversos controis levados a cabo, así como a coordinación e o intercambio de información entre as administracións e os consellos reguladores están dando resultados importantes na redución de casos de fraude de introdución de uva foránea na provincia, polo que se agarda que nesta campaña a tendencia continúe á baixa.

Á reunión, presidida polo subdelegado do Goberno en Ourense, Emilio González Afonso, asistiron o xefe territorial de Medio Rural, Yago Borrajo Sánchez; o tenente coronel xefe da Comandancia de Ourense, Rafael López Pinel; o comandante xefe de Operacións, José Fermín Díaz Silva; o comisario xefe do Corpo Nacional de Policía, Juan Carlos Blázquez Hernández; o xefe da Unidade do CNP adscrito á Comunidade Autónoma, José Antonio Pérez Estévez; e representantes dos Consellos Reguladores da Denominación de Orixe: Lara da Silva (Monterrei), Marta Villén (Ribeira Sacra) e Juan Manuel Casares Gándara (Ribeiro).