A Subdelegación do Goberno entrega 74.000 máscaras a concellos e entidades sociais da provincia de Ourense para a súa distribución entre colectivos de poboación vulnerables

A Subdelegación do Goberno entrega 74.000 máscaras a concellos e entidades sociais da provincia de Ourense para a súa distribución entre colectivos de poboación vulnerables

05/03/2021

O subdelegado do Goberno fixo entrega dun lote de 26.000 máscaras a Cáritas, Cruz Vermella e CERMI

O Concello de Ourense e a Deputación Provincial de Ourense recibiron un total de 48.000 unidades deste material de protección

Emilio González agradeceu a labor fundamental desenvolta polos concellos e polos colectivos sociais na protección dos máis desfavorecidos dende o comezo da pandemia


O subdelegado do Goberno en Ourense, Emilio González, fixo entrega durante a xornada de hoxe dun lote de 74.000 máscaras destinadas aos concellos e ás entidades sociais da provincia, nun novo reparto que realiza o Executivo central para atender a colectivos de poboación vulnerable e ao persoal de servizos esenciais das entidades locais.

Durante a mañá, Emilio González entregou un total de 26.000 máscaras aos representantes de Cáritas Ourense, María Tabarés; de Cruz Vermella, Felipe Ferreiro; e de COGAMI, Mónica Limia, para facilitar que o seu persoal, os seus usuarios e as entidades que forman parte do Comité de Entidades Representantes de Persoas con Discapacidade de Ourense (CERMI) poidan facer uso deste material de protección.

Así mesmo, o subdelegado do Goberno supervisou o dispositivo e entregou ao vicepresidente da Deputación Provincial de Ourense, Rosendo Férnandez, un lote de 31.500 máscaras para a súa distribución entre os concellos da provincia con poboación inferior a 20.000 habitantes. As restantes 16.500 unidades foron entregadas directamente ao Concello de Ourense.

Emilio González agradeceu a labor fundamental que realizan os concellos e as entidades sociais na provincia para a protección das persoas máis vulnerables e desprotexidas dende o inicio da crise sanitaria.

Con este novo reparto o número total de máscaras distribuídas polo Goberno de España na provincia de Ourense é de 522.500 unidades. “Con esta xa son sete as entregas que realiza o Executivo central dende o inicio da pandemia da COVID-19, co obxectivo de protexer ás persoas máis vulnerables e a quen traballa con estes colectivos, así como ao persoal dos servizos municipais esenciais”, indicou o subdelegado.

Así mesmo, Emilio González recalcou que “as máscaras son un elemento fundamental para coidar da nosa saúde e da do resto das persoas”, polo que lembrou a necesidade de “facer un uso correcto deste elemento de protección e respectar as normas dispostas polas autoridades sanitarias”.

REPARTO NACIONAL

En todo o territorio nacional, os ministerios de Sanidade e Política Territorial e Función Pública repartirán con esta nova entrega un total de 13.037.000 máscaras a través de entidades sociais e da Federación Española de Municipios e Provincias (FEMP). A distribución coordínase a través das Delegacións e Subdelegacións do Goberno en cada comunidade autónoma.

Un total de 7.206.000 unidades serán repartidas a través da FEMP e outros 3.012.000, a través de Cruz Roja. Pola súa parte, o CERMI recibirá 504.000 unidades; Cáritas, 266.000 e a European Anti Poverty Network (EAPN), outros 2.008.000. Ademais, repartiranse un total de 41.000 máscaras cirúrxicas directamente a Ceuta e Melilla.